Патниците во Европската Унија би требало да добијат посилна заштита при откажани летови, откако беше постигнат привремен договор за нови правила што ги опфаќаат различните видови превоз. Најзначајната промена се однесува на целосното враќање на парите за авионските билети.
Според договореното, доколку летот биде откажан, патникот ќе има право на целосна рефундација на платениот износ. Во повратот ќе треба да бидат вклучени и провизиите што ги наплатиле туристичките агенции или онлајн платформите преку кои е купен билетот.
Парите ќе треба да му бидат вратени на патникот во рок од седум дена. Кога билетот бил купен преку посредник кој претходно ѝ ја платил сумата на авиокомпанијата, целиот процес ќе може да трае најмногу 14 дена.
Со новите правила треба да се намалат проблемите со кои патниците често се соочуваат кога авиокомпанијата и посредникот меѓусебно ја префрлаат одговорноста за рефундацијата. Целта е патникот полесно да ги оствари своите права, без долготрајни процедури и нејасни барања.
Предвидено е воведување стандардизирани обрасци за барање поврат на парите и надомест. Тие треба да ја поедностават постапката и да овозможат поефикасно и поусогласено решавање на поплаките во сите земји од ЕУ.
Посебно внимание е посветено и на лицата со попреченост и на патниците со намалена подвижност. Тие ќе продолжат да имаат право на бесплатна помош во текот на целото патување.
Доколку авиокомпанијата процени дека од безбедносни причини е потребен придружник, тоа лице ќе може да патува бесплатно и да добие место до патникот на кој му помага.
Договорот сè уште не е конечен. За новите правила официјално да стапат во сила, тие најпрво треба да бидат одобрени од Советот на ЕУ и од Европскиот парламент.
