Јапонија повторно се упатува кон руската нафта, откако за првпат по февруарските американско-израелски напади врз Иран најави увоз на сурова нафта од Русија. Потегот доаѓа во услови на сериозни нарушувања на глобалниот енергетски пазар и фактичко затворање на Ормутскиот теснец, што ја зголеми неизвесноста за снабдувањето со енергенси во Азија.
Според информациите, станува збор за нафта од проектот „Сахалин-2“ на рускиот Далечен Исток, а пратката ја купила јапонската компанија „Таиџо оил“. Танкерот испловил кон крајот на април и се очекува да пристигне во префектурата Ехиме, во западна Јапонија.
Овој чекор јасно покажува дека Токио се обидува да обезбеди поразновидни извори на снабдување во време кога енергетската зависност од Блискиот Исток станува сè поризична. Јапонија долго време се потпира на увоз на нафта од тој регион, па новите тензии ја принудуваат побрзо да бара алтернативи.
Проектот „Сахалин-2“ е под водство на руски Газпром, а во него учествуваат и јапонските компании „Мицубиши Корпорејшн“ и „Мицуи и Ко“, што дополнително ја објаснува подготвеноста на Јапонија да ја одржи оваа енергетска врска. Според јапонските власти, конкретната испорака не е опфатена со санкциите што САД и европските земји ги воведоа кон Русија по почетокот на војната во Украина во 2022 година.
