Bitcoin продолжува да се движи во повеќемесечен надолен тренд, а дел од аналитичарите предупредуваат дека најголемата криптовалута можеби сè уште не го достигнала дното на тековниот циклус. Цената во моментов се задржува нешто под 63.000 долари, но пазарот внимателно ја следи зоната меѓу 60.000 и 63.000 долари.
Криптоаналитичарот Али Мартинез посочува дека токму во овој опсег се наоѓа најголемата концентрација на тргуван Bitcoin. Според неговите податоци, во зоната биле префрлени повеќе од 1,3 милиони BTC, поради што поддршката за понатамошното движење на цената е исклучително важна.
Мартинез смета дека нивото од 60.587 долари мора да се задржи за да не се влоши сегашната структура на пазарот. Доколку Bitcoin падне под оваа граница, следната позначајна зона би можела да се наоѓа околу 46.702 долари, каде претходно биле тргувани приближно 150.000 BTC.
Пробив и под тоа ниво, според неговото сценарио, би можел да отвори простор за пад до околу 37.867 долари. Bitcoin последен пат се движеше во близина на оваа цена кон крајот на 2023 година.
Друг аналитичар, познат како Chiefy, исто така очекува дополнително слабеење и предвидува можен пад до 44.000 долари. Според него, тоа би можело да биде последната фаза во која голем број инвеститори ќе се откажат од позициите, слично на случувањата во 2022 година.
Сепак, активноста на големите инвеститори не ја поддржува песимистичката прогноза во целост. Во текот на една недела, таканаречените китови купиле околу 30.000 BTC, во вредност поголема од 1,8 милијарди долари. Ваквата акумулација може да укажува дека тие очекуваат долгорочно закрепнување.
Дополнително, анонимен инвеститор отворил Bitcoin long позиција со 40x левериџ, вредна приближно 70,5 милиони долари. Станува збор за исклучително ризична позиција која би можела да биде ликвидирана доколку цената падне до околу 61.724 долари, освен ако не биде обезбедено дополнително покритие.
