Аналитичарите сè уште немаат заеднички став дали Bitcoin веќе го достигна дното на овој пазарен циклус, но повеќето од нив се согласуваат за една работа: долгорочната слика останува позитивна. Според главниот инвестициски директор на Bitwise, Мет Хуган, инвеститорите можеби премногу се фокусираат на точната цена на дното, наместо на поширокиот тренд што го препознаваат големите истражувачки компании.
Хуган ги споредува анализите на Galaxy Digital, NYDIG и Standard Chartered, кои имаат различни проценки за моменталната состојба на Bitcoin. Galaxy смета дека дното најверојатно сè уште не е достигнато, NYDIG оценува дека сигналите се мешани, додека Standard Chartered верува дека најниската точка веќе е зад пазарот.
Според Galaxy Digital, Bitcoin би можел да има уште простор за пад. Компанијата анализирала историски пазарни циклуси, valuation индикатори, расположение на инвеститорите и податоци поврзани со mining секторот. Од 13 сигнали што во минатото биле поврзани со пазарни дна, само четири се целосно исполнети. Поради тоа, Galaxy гледа потенцијална зона на дно меѓу 30.000 и 54.000 долари, со основно сценарио меѓу 40.000 и 46.000 долари.
NYDIG има повнимателен став. Според нив, корекцијата кај Bitcoin покажува многу карактеристики на циклично дно, но нема доволно јасни знаци на капитулација, што било случај со големи пресврти. Сепак, фирмата смета дека растечката институционална побарувачка можеби го менува традиционалниот пазарен циклус на Bitcoin, што значи дека дното би можело веќе да е формирано.
Standard Chartered е најоптимистичен меѓу трите анализи. Според Џефри Кендрик, Bitcoin најверојатно го поставил цикличното дно на околу 59.000 долари. Банката, која претходно очекуваше пад кон 50.000 долари, сега прогнозира раст до 100.000 долари до крајот на годината.
И покрај различните краткорочни проценки, Хуган посочува дека трите истражувачки тима имаат важни заеднички заклучоци. Сите сметаат дека Bitcoin е поблиску до дното отколку до врвот, сите очекуваат дното да се случи оваа година, и сите прогнозираат нов bull market циклус.
За долгорочните инвеститори, тоа може да биде поважно од точната цена на дното. Без разлика дали Bitcoin ќе најде поддршка околу 43.000, 50.000 или 59.000 долари, клучното прашање останува колку високо може да се искачи во следната фаза од циклусот.
