Луфтханза најави откажување на 20.000 кратки летови до октомври, како дел од мерките за справување со наглиот раст на цената на керозинот, кој според компанијата се дуплирал од почетокот на војната во Иран. Со оваа одлука, групацијата планира да заштеди околу 40.000 тони гориво и да го намали бројот на неекономични кратки релации.
Во рамки на прилагодувањето, Луфтханза ќе ја оптимизира понудата преку своите шест главни центри во Франкфурт, Минхен, Цирих, Виена, Брисел и Рим, со цел патниците и понатаму да имаат пристап до нејзината глобална мрежа. Првите 120 дневни откажувања, кои важат до крајот на мај, веќе почнале да се применуваат, а засегнатите патници се известени.
Меѓу линиите што привремено се укинуваат се летовите од Франкфурт до Бидгошч, Жешов и Ставангер, додека дел од другите конекции ќе се пренасочуваат преку алтернативни аеродроми во рамки на групацијата. Компанијата најавува и ревизија на среднорочното планирање на мрежата, а повеќе детали се очекуваат на крајот на април или почетокот на мај.
И покрај овие намалувања, Луфтханза тврди дека очекува во голема мера стабилно снабдување со гориво за летовите што остануваат во летниот распоред.
