На Волстрит во четврток индексите S&P 500 и Nasdaq достигнаа нови рекордни нивоа, но тргувањето се одвиваше внимателно, додека инвеститорите ги следеа најновите случувања на Блискиот Исток и објавите на кварталните финансиски резултати на компаниите.
Индексот Dow Jones порасна за 0,24 проценти, достигнувајќи 48.578 поени, S&P 500 се зголеми за 0,26 проценти на 7.041 поен, додека Nasdaq забележа раст од 0,36 проценти, искачувајќи се на 24.102 поени.
Пазарите добија поддршка од охрабрувачките вести од Блискиот Исток. Израел и Либан постигнаа договор за десетдневно примирје, а американскиот претседател Доналд Трамп соопшти дека Иран во текот на мировните разговори понудил да се откаже од нуклеарно оружје во период подолг од 20 години.
Трамп дополнително изјави дека САД и Иран се многу блиску до постигнување договор, најавувајќи можност да отпатува во Пакистан доколку дојде до негово потпишување.
Пазарите реагираат на позитивни, но и умерено неутрални информации поврзани со состојбата на Блискиот Исток. Во изминатите месеци и половина, тргувањето во голема мера зависи од вестите за конфликтот со Иран“, изјави Крис Закарели, директор во компанијата Northlight Asset Management.
Во почетните недели од конфликтот меѓу САД, Израел и Иран, цените на акциите на најголемата светска берза значително опаднаа. Сепак, благодарение на надежите за мировен договор, во последните недели индексите ги надоместија индексите, при што S&P 500 и Nasdaq два дена по ред поставуваат нови рекорди.
Во фокусот на инвеститорите остануваат и кварталните резултати на компаниите и банките, при што повеќето објавија подобри резултати од очекувањата на аналитичарите.
Сепак, има и исклучоци, така, акциите на брокерската куќа Charles Schwab паднаа за повеќе од 7 проценти.
Во продолженото тргувањепо затворањето на Волстрит, значително – околу 8 проценти – се намали и вредноста на акциите на Netflix, откако компанијата го објави својот финансиски извештај.
Позитивен тренд беше забележан и на повеќето европски берзи. Лондонскиот индекс FTSE порасна за 0,29 проценти на 10.589 поени, франкфуртскиот DAX за 0,36 проценти на 24.154 поени, додека парискиот CAC забележа благ пад од 0,14 проценти, спуштајќи се на 8.262 поени.
