Оптимизмот на криптопазарот повторно се зголеми откако Bitcoin неодамна се врати над границата од 80.000 долари, иако оваа недела цената повторно се спушти под тоа ниво. Засега, најголемата криптовалута се стабилизира веднаш под психолошката граница, додека инвеститорите внимателно ги следат глобалните финансиски пазари, каматните стапки и движењето на цените на нафтата.
Аналитичарите оценуваат дека криптосекторот и понатаму зависи од апетитот за ризик. Во последниот период, голем дел од вниманието и капиталот се насочени кон технолошките акции, особено кон компаниите поврзани со вештачка интелигенција. Сепак, пазарите се циклични, па дел од експертите сметаат дека враќањето на поголемиот интерес кон криптовалутите е можно доколку инвеститорите повторно почнат да бараат повисок принос надвор од традиционалните пазари.
Дополнително внимание привлече SpaceX, компанијата на Илон Маск, која според документите поврзани со најавената иницијална јавна понуда на акции, поседува Bitcoin во вредност од околу 1,45 милијарди долари. Компанијата уште во 2021 година додаде Bitcoin во својот биланс, а на крајот од декември имала 18.712 биткоини, купени за околу 661 милион долари.
Ова ја позиционира SpaceX меѓу десетте најголеми корпоративни сопственици на Bitcoin во светот. Интересно е што количината останала непроменета во однос на крајот на 2024 година, што покажува дека компанијата не ја намалила изложеноста и покрај големите пазарни осцилации.
Во меѓувреме, нова тема на пазарот е и можната промена во ставот на американската Комисија за хартии од вредност (SEC) околу токенизираните акции. Според одредени извештаи, регулаторот разгледува можност платформи од трети страни да токенизираат акции без директно одобрение од издавачите. Доколку се реализира, тоа би можело да отвори нова фаза во развојот на токенизирани хартии од вредност и да ја приближи традиционалната берза до блокчејн инфраструктурата.
