Објавата за прекин на огнот во конфликтот со Иран донесе силно олеснување на светските пазари и остар пад на цената на нафтата, но првичната еуфорија не значи дека економската опасност е завршена. Напротив, сè повеќе аналитичари предупредуваат дека штетата од изминатите шест недели ќе продолжи да тежи врз глобалната економија уште долго време.
Иако пазарите реагираа позитивно, проценките се дека закрепнувањето нема да биде ниту брзо ниту лесно. Цените на горивата, авионското гориво, комуналните услуги и ѓубривата нема веднаш да се вратат на претходните нивоа, што значи дека и домаќинствата и компаниите ќе останат под притисок од повисоки трошоци.
Според анализата на Reuters, американската нафта можеби паднала околу 20 проценти од врвот за време на конфликтот, но и понатаму е околу 40 проценти поскапа во однос на периодот пред избувнувањето на војната. На годишно ниво, цената е дури околу 60 проценти повисока, што сериозно го зголемува ризикот од подолготрајни инфлаторни притисоци.
Во такви услови, аналитичарите предупредуваат дека светот може да влезе во период на посилен притисок врз растот, повисока инфлација и поголема неизвесност во економските политики. Централните банки би можеле да бидат многу повнимателни со намалување на каматните стапки, а во дел од случаите не се исклучуваат ниту нови заострувања.
Пораката е јасна: примирјето донесе краткорочно олеснување, но не и враќање во нормала. Инвеститорите можеби слават, но економската реалност останува значително потешка и понеизвесна од онаа пред конфликтот.
