Цената на бакарот на светските пазари продолжува силно да расте и повторно се приближува до историски рекордни нивоа. На Лондонската берза металот достигна околу 14.000 долари за тон, откако цената порасна за дополнителни 2 проценти, додека раст е забележан и на американскиот пазар поради можноста Вашингтон да воведе нови царини за бакарот.
Главниот двигател на растот е зголемената побарувачка од Кина, најголемиот светски потрошувач на бакар. Таму модернизацијата на електропреносната мрежа и намалувањето на залихите укажуваат на посилен индустриски циклус, а кинеските прогнози веќе најавуваат висока побарувачка и во следната деценија. Бакарот е клучен метал за електрификација, енергетска инфраструктура, индустрија и зелена транзиција, па затоа неговата цена често се гледа како сигнал за состојбата на глобалната економија.
Дополнителен притисок доаѓа и од страната на снабдувањето. Воените дејствија во регионот на Заливот создаваат ризик за испораките на сулфур од Блискиот Исток, што е важно бидејќи значаен дел од светското производство на бакар зависи од сулфурна киселина како дел од производниот процес. Во исто време, инвеститорите во САД очекуваат нов извештај за домашниот пазар на бакар, кој може да влијае врз идната царинска политика.
Додека светот сè повеќе бара бакар, Македонија засега ограничено го користи својот потенцијал. Од активните рудници за метали, бакар ископува главно „Бучим-Боров Дол“, но таму капацитетите постепено се намалуваат. Истражувања за бакар и злато има и во други региони, а најчесто споменуван пример е Иловица-Штука, каде досегашните геолошки испитувања покажале присуство на големи количини минерализирана руда со бакар и злато.
Според проценките, евентуален рудник во Иловица-Штука би можел да произведува околу 16.000 тони бакар годишно и да создава значителен извозен приход, зависно од движењето на светските цени. Сепак, проектот останува блокиран поради административни, правни и еколошки прашања.
Стратегијата за минерални суровини 2026–2046 укажува дека Македонија има потенцијал да го развива рударството како извозно ориентиран сектор, но за тоа се потребни нови истражувања, јасни правила и сериозно почитување на еколошките стандарди. Во услови кога бакарот станува сè поважен глобален ресурс, прашањето е дали земјата ќе успее да го претвори геолошкиот потенцијал во реална економска предност.
