Во Торонто се одржа првиот состанок на Основачкиот одбор на новоформираната Канадско-македонска стопанска комора. Иницијативата има за цел да стане клучна платформа за поврзување на македонскиот бизнис сектор во Канада.
Основачкиот одбор го сочинуваат Милосов Лукароски, Теа Пешева, Диана Индовски, Иван Лукароски и Кирил Колемишевски, кои со оваа иницијатива најавуваат ново поглавје во економското поврзување и организирање на македонската заедница во Канада, информираат од основачите. Основачкиот тим ја започна оваа иницијатива со амбиција да создаде организирана и влијателна мрежа на претприемачи, професионалци и компании со македонско потекло.
На состанокот беа дефинирани главните насоки на дејствување, со акцент на поддршка на бизнисите, поттикнување на претприемништвото и создавање силна, координирана заедница. Целта е не само зајакнување на економските врски внатре во дијаспората, туку и отворање нови можности за соработка, инвестиции и трговија меѓу Македонија и Канада.
Комората ќе функционира како платформа за професионален развој, размена на знаење и воспоставување конкретни деловни партнерства. Намерата е да се изгради одржлива економска мрежа што ќе носи реални резултати, наместо да остане само симболична иницијатива.
Основачите нагласуваат дека оваа организација има потенцијал да стане значаен двигател на економското поврзување, со фокус на долгорочен раст и зајакнување на македонскиот бизнис идентитет во странство.
Со овој чекор, Канадско-македонската стопанска комора го означува почетокот на нова фаза на организирање на дијаспората, со јасна визија за посилна економска соработка меѓу двете земји. Комората веќе најавува отвореност за членство и партнерства со сите заинтересирани компании и поединци.
