Администрацијата на претседателот Доналд Трамп разгледува различни сценарија за можни растови на цените на нафтата, вклучително и сценарио каде барел би достигнал 200 долари. Според извори на Блумберг, овие анализи се дел од редовните проценки за кризни ситуации и не се предвидување на идните трендови на пазарот. Целта е владата да биде подготвена за сите можни развои, вклучително и продолжен конфликт кој би влијаел на снабдувањето.
Американскиот секретар за финансии, Скот Бесант, пред почетокот на кризата веќе изразил загриженост дека конфликтите би можеле да ја зголемат цената на нафтата и да ја нарушат економијата. Истовремено, портпаролот на Белата куќа, Куш Десаи, ги отфрли шпекулациите дека администрацијата „очекува“ цена од 200 долари, потенцирајќи дека се работи само за проценки на различни сценарија, додека краткорочните нарушувања не се причина за загриженост.
Од почетокот на конфликтот, цените на суровата нафта значително пораснаа: WTI достигна околу 91 долар за барел, а Brent над 102 долари, што веќе влијае на малопродажните цени на бензинот во САД. Министерот за енергетика, Крис Рајт, оцени дека цената од 200 долари е „малку веројатна“, но аналитичарите предупредуваат дека и пониски цени би можеле да ја забават економијата и да ја зголемат инфлацијата во САД и Европа.
Еден од главните ризици останува нарушувањето на испораките преку Ормускиот теснец, кој пренесува приближно петтина од глобалниот извоз на нафта и гас. Претседателот на Федералните резерви, Џером Пауел, истакна дека сè уште е рано за проценка на целосното влијание на енергетските цени врз американската економија.
